Texte nicht nur lesen, sondern auch performen: Dominic Oppliger (rechts) bei einem Auftritt mit Musiker Papiro an der Bad Bonn Kilbi. Foto: Vincent Glanzmann
VON DOMINIC OPPLIGER
___
deet ufte landschtraas hani ja noni gwüsst wasmi bi betty und doug dihei wird erwarte. zune häpfom himmel ufti zerfurchti einöödi prännt. am horizont tunkelbruuni hügelzüg. e hellgraui schtraass wo is bruungrüne nüüt uselauft. ufem ganze wäg kä einzigi mänscheseel. käs auto. immer nur s flimmere fode hiz über de fetröchnete weide linx und rächz fode schtraass. mängisch chlini insekteschwärm wi einzelni tunkli näbelschwade ide ferni. usser mine schritt undusserem raschle fomine chleider unte täsche käseinzix grüüsch. sobaldi schtaa plibe bin ischs muxmüüslischtill worde.
hananöpfil mee dänkt als an nechschte schritt. hami ja di ganz zit gfrögt öps tumm isch fo mir min schtetig tropfende schweiss mitte zungenapzschläke. waschinli chumi so jano mee turscht über. und überhaupt hanimer scho aafangenuusmale das da niä mee es huus chunt unti schtraass für immer wird wiitergaa unteinödi für immer linx und rächz fo mir und nur immer di hügelzüg und irgendwänn de letschti tropfe wasser trunke und ich irgendwo zämekauert am wägrand eländ am fereke.
aber dänn sinz da xi. zersch nur im flimmere überere langzogne wölbig ide landschaft. dänn immer klarer. hüüser. gitterzüün. parkierti autos. pick-ups. linx und rächz fode schnuergrade schtraass. parkpläz. boim. gärte. umplözli wider grüüsch. kleffendi hünd. einzelni chüe und geisse wo umemuled. fereinzelt schtampfendi huuf uf trochner erde. es glöggli am hals fomene tier. wiiterhin kä mänscheseel.
nach paar minute bini bide betty irere noiie adrässenaacho. sisch sletschte huus xi a somene blintarm wo fode hauptstraass apgangenisch und nach öppe driisg meter imene gschtrüpp gändet hät. mortimer drive. zersch zwei grundschtük mit ufböklete trailer oni reder. mee schlächt als rächt umzüünt. apfall und schrott ufte fertröchnete erde forde hüser. halb zerleiti töff. en fölig ferdräkte quad. kä anig öpta öpper wont.
bim hindere häz andersch uusxee. en fascht saftig grüene raase umes wiisses eischtökix holzhuus mipferanda. garasch. opschtboim. en gmüesgarte. en raseschpränger wo in hochem boge über de grüen raase grägnet hät. ums grundschtük ume en mannshöche maschedraatzuun mit schtacheldraatgarnitur. irgendwo spfluttere fomene generator und irgendes gebilde wo waschinli e wasserpumpi isch xi häzin lange hebel gliichzitig ruig und rukartig bewegt und rüpmisch giipschet.
de betty ire alti wiissi vw-golf isch näpte garasch fom huus gschtande. biz roschtig zwar unzowiit i xee han beidi forderpnö platt. aber dasischen xi. mit dem simmer for zwölf jaar immer underwäx xi. itschuel. is fuessballträning. zum pookere. ikile. zum ässe. it mall. an prom.
troz em no trespassing-schild am maschedraat hani probiert öptüür fom haag offenisch. tazächlich ischsi uufgange undhätt es windschpiil wo obenade tüür ghangetisch luut zum bimmele praacht. ich hami gfroit dbetty nach so langer zit wider zxee.
was nacher passiärt isch weisi nur no schemehaft. alles rundume isch wi iigfroore schtillgschtande. tropfe fom raseschpränger wi fotografiert ide luft. swindschpiil wi erschtarrt über de gittertüür. ein einzelne gloggeschlaag schtehend i mim oor. es rasant lüüter werdenz chraze und schtüübe. es hechle. es riisix ding wo in halsbrächerischem tempo über twise ufmich zueraasst. dänn schmerz im arm. en schlag ufmin hinderchopf und grashälm a minere bagge. grashälm formim aug. de gruch fo raase iminere nase. öppis tunkels wosich wi wild übermir bewegt. es oorezerrissenz chnure undes bilpfo mässerscharfe riisezää unzäflüssigem schpeichel undeme füechte root fo zungenund rache.
*
di beschtie hettimi deet anort und schtell zerfleischt wär de doug nözonen paranoide waffefanatiker. schiins heg dä innert paar sekunde eini fosine knarrene defore gha umpfode feranda uus sim geliäpte donovan en betoibixpfiil ipflangge gschosse. nötas das riisige rimpfii schwirig zträffe xi wär. aber schnäll musch si.